Gusto ko po sanang bigyan ng kaunting financial assistance ang aking mga empleyadong pansamantalang walang sahod dahil suspendido ang operasyon ng aking negosyo bunsod ng enhanced community quarantine (ECQ). Ano ba ang mga kailangan kong tandaan bilang employer kung gusto kong bigyan ng ayuda ang aking mga empleyado?
– Jenny
Dear Jenny,
Maganda ang layunin mo dahil ang pagbibigay ng tulong sa mga manggagawa ngayong panahon ng pandemya ay isa sa mga pinapakiusap ng ating pamahalaan sa mga employer na katulad mo.
Maipapayo ko lang na mas maganda na sa halip financial assistance ay ang kaukulang 13th month pay na lang para sa mga nakaraang buwan ang iyong ibigay sa mga empleyado mo.
Kakailanganin mo rin namang ibigay ang 13th month pay sa dulo ng taon kaya mas maganda kung ibigay mo na ngayon ang kaukulang bahagi nito kung kailan lubos na nangangailangan ang mga empleyado mo.
Mas magandang bahagi ng 13th month pay na lang ng mga empleyado mo ang iyong ibigay kaysa sa financial assistance dahil kabawasan na ito sa mga kailangan mong bayaran sa dulo ng taon.
Kung desidido ka naman na tulong pinansyal lang ang ibigay mo ay siguraduhin mo na lilinawin mo sa mga empleyado mo na ito ay “one-time” na ayuda lamang at ibinigay mo lamang ito dahil sa nararanasang krisis ngayon.
Mahalaga ang paglilinaw na ito dahil may posibilidad na mabansagang “company practice” ang pagbibigay mo ng financial assistance sa mga empleyado at maaring mahabla ka o ang iyong kompanya kung hindi ito maibigay sa mga susunod na pagkakataon.
Sa ilalim kasi ng labor law, hindi maaring basta-bastang itigil ng isang employer ang pagbibigay ng mga benepisyong karaniwan at regular na niyang ibinibigay sa kanyang mga empleyado. Ang pagbibigay ng mga benepisyong ito, kahit na wala naman sa kontrata o hindi naman ipinag-uutos ng batas, ay matatawag ng “company practice” at maaring magsampa ng reklamo ang mga empleyado kung hindi na ito maibigay sa kanila." - https://www.affordablecebu.com/