Required po ba ang mga pribadong kompanya na katulad ng pinapasukan ko na magbayad ng hazard pay ngayong nasa ECQ pa rin ang lugar namin? – Joel
Dear Joel,
Hindi required ang mga pribadong kompanya na patuloy ang operasyon sa ilalim ng enhanced community quarantine o ECQ na magbayad ng hazard pay sa mga empleyado nito.
Gayunpaman, sa ilalim ng Administrative Order No. 26 na pinirmahan ni President Duterte, ipinag-uutos ang pagbibigay ng hazard pay sa mga empleyado ng gobyerno na pumasok sa trabaho sa panahon ng lockdown.
Nakasaad din sa nabanggit na AO ang taimtim na pakiusap ng gobyerno sa mga pribadong ospital at health facilities na bayaran ng hazard pay ang health workers at staff nila dahil sa panganib na dulot ng coronavirus na kinakaharap nila araw-araw.
Base sa nabanggit, hindi talaga required sa private companies ang pagbabayad ng hazard pay ngayong panahon ng pandemya. Maari ka sigurong umasa kung ikaw ay namamasukan sa isang ospital o health facility ngunit kung babasahin ang nabanggit kong AO, makikita na ang pagbabayad nito ay nakadepende pa rin sa kagustuhan ng kompanya dahil wala namang nakatakdang kaparusahan sa hindi pagtalima sa pakiusap ng ating gobyerno." - https://www.affordablecebu.com/